ARAKSUEhe

Su hitza

araksue — Thu, 17 Jun 2010 10:52:33 +0000

Izugarri gozatu nuen atzoko partidan. Ez nuen uste Munduko Futbol Txapelketak horrelakorik sortu zezakenik nigan. Suitzak irauzi zuen eta Espainiak galdu. Oberenan lagun kuadrila bildu ginen Euskal Herriko selekzioaren kamiseta jantzirik, Espainia desanimatzeko prest. Aspertu ere egin ginen momentu frankotan, izan ere, partida ez zen sobera ona izan. Halako batean heldu zen gola, txiripaz, “bideos de primera” zirudien horrek, baina Suitzari garaipena eman zion eta Espainiari porrota. Gaur goizean prentsa espainiarreko azalak “dezepzionaturik” agertu dira. Eta ez da gutxiagorako ere, izan ere, eman dioten bonboaren ondoan (Manolorena baino haundiagoa izandu da ta!) faboritoa etsiturik geratu zen atzokoan.

Irudia: Zaldi Eroa

Suitza goratzen ari da Euskal Herria -Media Marck ere horretan ibiliko da- eguna alaitu baitigu. Gora Suitza! facebooken, gora suitzar txokoltia! tuentin eta gora bollo suitzoak! twiterren. Egia esan, espainiarrak mundialarekin anestesiaturik baziren, orain euskaldunok gara hodei horretan murgildu garenak. Baina oinak lurrera! Espainiari su, Euskal Herriari hitza! GORA SUITZA!

Agerikoa ezkutuan

araksue — Tue, 01 Jun 2010 11:20:56 +0000

Diario de Noticiasi eskutitza bidali diot gaurkoan, ez dakit argitaratuko didaten, baina tira, nik nire lana egin dut bederen. Izan ere, nazkagarria da Nafarroako egunkari “progreak” nola jokatzen duen bizi dugun gatazka politikoaren inguruko informazioarekin. Gure herrialdean eskela gehien inprimatzen dituen egunkariaren alternatibak, nahiago du isilik geratu aurkitu berri den Guardia Zibilaren dokumentuaz hitz egin baino. Apirilaren 14an erregistraturiko lekuetako batean aurkitu dute dokumentua eta Berriak eta Garak haien azaletara eraman dute. Bertan, atxiloketan jokatzeko gisa azaltzen zitzaien polizia berdeei. Hiru abokatuen (Iker Sarriegi, Jon Enparantza eta Arantza Zulueta) eta Erramun Landa artistaren tratua “ezinhobea” izan behar zuela azaltzen zuen eta besteei dagokionez, “adierazpenen bat lortzea, akusazio judizialak berreste aldera” bideraturik egon beharko zuen tratuak. Egunkariek azaltzen dutenez, dokumentuan agerian uzten dira inkomunikazio aldiko legez kanpoko jarduerak.

Argazkia: Daquella Manera (Flickr ), CC

Gaur goizean Diario de Noticiasen edizio digitalera jo dudalarik, baina, ez dut dokumentuaren inguruko aztarnarik aurkitu. Juan Carlos Iriarteren atxiloketak bigarren postua lortua zuen, bere aurretik ONUk ez duela Israel kondenatu.

Antza, Noticias Taldeak nahiago ditu filtrazioak eta eskutitz ikusezinak, Berriak eta Garak lortu duten dokumentu hau baino.

Gora España!

araksue — Fri, 28 May 2010 09:30:21 +0000

Hori baizik ez zitzaien geratu Vaya Semanitako lagunei saio normalizatua borobiltzeko.

Jakina da Vaya Semanitak beheiti egin duela azken aldian. Kritikak izan ditu bazter aunitzetatik eta normalizatzeko emandako urratsak gero eta nazkagarriagoak dira: Tele 5ri esketxak saltzetik, Tele 5ri egokituriko esketxak egitera pastu da ETB2. Baina lasai, ez baita inolako esku-hartze politikorik programan. Hori azaltzen digu El Paisek bederen. Ez hori bakarrik, orain inoiz baino gehiago sartzen omen dira PSE eta PPrekin.

Baina Gora Españaz ari nintzen eta horri helduko diot. Atzo afal ondoan sofan etzin nintzen lasai-lasai. Etxean, zoritxarrez, ez dute aldatu Vaya Semanita ikusteko ohitura (egia esan sobera ez dago aukeratzeko) beraz, programa ikusten eman nuen gaua. Hasierako esketx batean Eusko Jaurlaritza ageri zen, bertan bozeramaileren bat -edo lehendakaria bera, ez dut gogon- eta gibelean ikurriña eta espainiar bandera. Moskeatzen hasi nintzen, baina ez nion sobera garrantzirik eman nahi izan. Aitzina jarraitu zuen programak eta hamar aldiz guttienez ikusi behar izan nuen bandera espainiarra esketx ezberdinetan. Bietan espainiar nortasun agiria egiteko bulegoa agertu zen (bietan, noski, bandera arrotza gibelean), Eusko Jaurlaritza ere behin baino gehiagotan agertu zen espainiartasuna goratzen eta PSE-PP paktuaren inguruko esketxean nola faltako bandera gorri eta horia? Baina espainiar bandera sobera ez omen ziren agertu, beraz, ideia ona izan zuten VSko gidoilariek: hiru txakurren abenturak eta desbenturak kontatzen zituen bieoa grabatzea! Hor ere, noski, una grande y libre lau haizeetara zabaltzen.

Baina banderaz gain, Frankok paraturiko erregearen argazkia ere ikusi nuen behin baino gehiagotan. Mezu subliminalak ote?

Argazkia: Youtubeko bideotik ateria
Normalizatuegi ikusi nuen Vaya Semanita, baina saioaren hondarrean programa borobildu nahi izan zuten. Bat-batean David Bisbalek espainiar selekzioaren alde eginiko kantua paratu zuten-ez dut estekarik paratuko, nahi duenak bila dezala interneten!-. Isilik geratu zen nire etxeko sala, kantu hori baizik ez zen aditzen. ZEEEEER?! Eta Andoni Agirregomezkortak ongi azaldu zuen kantu hori zer zen eta zer karietara paratu zuen, inor moskeatu ez zedin: antza, mundialeko kanta da (horrela denak kontent, ez baita espainiar selekzioaren aldekoa) eta paratu bazuten, kasualitatez heldu den asteko gonbidatua David Bisbal izanen delakoz baizik ez zen izan.

Ba hori, espainiar selekzioaren aldeko kantuarekin akitu eta Gora España baizik ez zela geratu. GORA NORMALIZAZIOA! ere esan zezaketen, honela espainiarrak ez garenok agian ez ginen enteratuko zertaz ari ziren eta…

Euskaraz bizi nahi dut!!!

araksue — Sat, 15 May 2010 12:24:26 +0000

Aldarrikatu ozen,
NAFARROAN EUSKARAZ BIZITZEKO ESKUBIDEA DUT!
EUSKARAZ BIZI NAHI DUT!!!

18:00 GOLEM ZINEMETATIK

Salatzen

araksue — Fri, 14 May 2010 20:53:23 +0000

Martxan da PSE-EEren plan berria: “web antiterrorista” delakoa. Patxi Lopezek gustukoago duen kaleko hizkeran, “salatarien webgunea” edo “inkisizioaren webgunea” ere dei geniezaioke. Helburua? kaleak hartu (“Kalea gurea da!”) eta haien gisako espresio ez den oro ezabatu.

Webgune honek, baina, ez du helburu bakar hori; garrantzitsuena bederen ez da kaleak “berreskuratzea” deitzen dutena (noiz izan dira kaleak inorenak?). Ikuspuntu historikotik behatu dezakegu webgune honen helburua. Historian zehar franko ageri zaizkigu honelako salatari ekintzak, non bizilaguna salatzea doakoa baitzen. Inkisizio garaian ez zen inolako frogarik behar sorginak behatzez seinalatzeko. Franko diktadorearen aroan ere ez zen beharrezkoa frogarik aurkeztea bizilagunari “gorria” izatea leporatzeko. XXI. mendean ezin dira iraganeko ohitura onak galdu, eta hemen dugu Eusko Jaurlaritzako Barne Ministroa bere tresna berriarekin. Diotenez, ez da beharrezkoa daturik uztea, beraz, inolako frogarik gabe eta inolako ondorio judizialik gabe, doakoa da bizilaguna salatzea. “Rojo”, “hereje” edo “terrorista”, berdin du, disidentzia zigortzeko tenorean klase boteredunak herriaren laguntza nahi du, heldu ezin diren lekuetara heltzeko.

Argazkia: El confidencial, Efe

Kuriositatez, eta ez inor salatzeko asmotan, webgunea arakatzen ibili naiz gaur goizean. “Terrorista bilatuenen” argazkiak ageri dira eta argi azaltzen digute nola jokatzen duten “terrorista” hauek. Baina, dudarik gabe, webgune honen perlarik preziatuena “terrista=delinkuentea” bideoa da. Non ikurriñak ageri baitira jendartean izua sortzen, Txikia, Pertur, Lasa eta Txiki terroristatzat hartzen baitira eta Carrero Blancoren gisako frankistak biktima gaixoak bailiran aurkezten baitzaizkigu. Ez hori bakarrik, bideoa doktrinazio tresna baizik ez da, nun Euskadi Ta Askatasuna erakundearen sorrera testuingurutik landa azaltzen baita eta Adolfo Suarez demokrataz janzten baitute. Doktrinamendua, eskoletara eraman nahi duten doktrinamendua. Konfrontazioa, karrikan geroz eta biziagoa den konfrontazioa. Salatariak, Estatuko Babes Indarrak “laguntzeko” baina poliziarena ez egiteko (Ares dixit).

Portzierto, arestian aipatu dudan “kalea gurea da” adierazpenak ere iraganeko adierazpenak dakarzkit gogora.

Erradikalak

araksue — Mon, 26 Apr 2010 17:29:15 +0000

Egun lasaia da gaurkoa, eguzkia ortzian, galtza motzak soinean eta udaberriak dakarren poztasuna irrian. Polita da ere ikustea espainiar Estatuan III. Errepublikaren aldeko itxaropenak badirauela. Larunbateko manifestazioan jende andanak atera zituen banderak astintzera. 36ko momiendako ozpina, erradikalizazioa, heresia, maltzurkeria, apokalipsia!! Kontuz!!
Publikon irakurri ditut PPko Komunikazio idazkari-orde den Esteban Gonzalez Ponsen hitzak (izena luzea, kargua putza, baina hitzak ederrak). Haren ustetan larunbatekoa manifestazio erradikala izan zen. Ez, falange espainiarrak deiturikoa ez, hori txikikeri bat da, erradikalak errapublikanoak dira! Bestalde, Falangeren gisako alderdien ilegalizazioaz galdeturik, ez zuen busti izan nahi eta “A mí no me gusta que haya partidos fascistas pero lo tolero porque creo que en mi condición de demócrata está en tolerar la extrema derecha o izquierda. Bai, extrema izquierda belztu dut, izan ere, PPren betebeharra da ere ezker erradikala onartzea. Orduan, zertara etorri da hainbeste zalaparta III. Errepublikaren aldeko oihuengatik? Eta erradikalak onartzeaz ari garenez gero, ezker abertzalea (haiendako la izquierda aberchale radical) ere onartu beharko du Alderdi Popularrak?

Argazkia: Guillermo Sanz, Público

Baina esaldi onenaren saria, honako honek lortu du: “España tiene más olvidada la Guerra Civil de lo que algunos medios creen”, eta gero koletilla “El Gobierno de España esta más cerca de las minorías radicales que de los ciudadanos españoles”. Hau da hau! Erradikalak leku guzietarik, larritzen hasi beharko, zeren espainiar Gobernuak jarraituko balu talde minoritario erradikal hauekin manifestatzen, larunbateko oihuak egi bihurtuko liratezke (Espainia bihar errepublikanoa izanen dela zioten) eta Espainiako Zuzenbide Estatu Demokratiko eta Sozial Monarkiko-Parlamentarioa erauntsiko litzateke!!! KONTUZ!

Argi dago, nik sistema bat egiten badut, nire gisara, nire erosotasunean pentsatuz, erraza da gero sistema horren aurka egiten duena erradikal deitzea. Baina, ez al da erradikala diktadurarekin apurtu ez izana? ez al da erradikala 150 falangistek eginiko manifestazioa onartzen den bitartean Gerra Zibileko biktimen aldeko manifestariak erradikaltzat hartzea? Ez al da erradikala Badalonan “ez dugu errumaniarrik nahi” mezua zabaltzea?

Irauli sistema, izan erradikala.

enaltecimiento San Ferminetan?

araksue — Fri, 16 Apr 2010 17:59:34 +0000

Gertu ditugu San Ferminak, gertu besta, musika eta dantza uztartzen dituzten 9 egunak. Aurten, baina, enaltecimiento egoteko aukerak haundiak dira, izan ere, txupinazoa botatzea zegokion alderdiak, hau da, Eusko Abertzale Ekintzak (ANV-EAE), suzia Iruñeko konpartsak bota dezan nahiago duela esan baitio Bartzina alkatesari. Beraz, dilema morala dugu alde batetik eta kontraesanetan erortzeko arriskua bestetik. Izan ere, zer gertatuko litzateke Cara Vinagrek txupina botako balu, ANV-EAEk horrela nahi izan duelakoz? Ez al da hau bada Berriozarreko txupinazoan gertaturikoaren kalkoa? Edo UPNk ezker abertzaleak nahi duena egiten badu ez al du “terrorismoa” gorazartzen, ez al du “txantajearen” aurrean amorerik ematen, ez al ditu “biktimak” iraintzen?

Argazkia: Euskalerria Irratia, CC
Nire txoko ttiki honetatik esan beharra dut, nik ere facebooken Konpartsaren aldeko taldean sartu naiz. Nik ere uste dut txupinazoa ez dela alderdiei dagokien zerbait, herriari zor zaiolarik ohore hori. Izan ere, bada garaia gure hiriburu maiteak jai herrikoi eta parte hartzaileak berreskuratzeko. Bada garaia besta euskaldun eta parekideez gozatzeko. Bada garaia herriak herriarendako eginiko festak antolatzeko. Pribatizazioari aurre eginez, turistengan pentsaturiko egitaraua baztertuz, gureak direlakoz bestak, herriarenak alegia. Denak izanen dira ongi etorriak, baina gure etxean gaudelarik gure gisan eginen ditugu bestok.

Gora San Ferminak, eta ZORIONAK Iruñeko Erraldoi eta Buruhandien Konpartsari. 150. urte hauetan zehar lortu baituzue haur, gazte, heldu eta zaharren aurpegietan irria marraztea. Gora herria!

Gehiago:

http://www.noticiasdenavarra.com/2010/04…
http://www.noticiasdenavarra.com/2010/04…

libre?

araksue — Tue, 13 Apr 2010 09:17:46 +0000

Krudela da

araksue — Tue, 16 Mar 2010 18:49:21 +0000

Krudela da bizitza
gehien maite duguna kentzen digularik
Krudelagoa da bizitza
hori baldin bada kolpetik
Krudela da bizitza
aitzina jarraitzera behartzen gaituelarik
Krudelagoa da bizitza
hasi behar bada hasieratik
Krudela da bizitza
berau uztea egokitu zaigularik
Krudelagoa da bizitza
badelako bizitzen jarraitzen duenik

Muxu haundi bat Kattalin!

Zorionak, zoritxarrez…

araksue — Mon, 08 Mar 2010 19:32:01 +0000

Zorionak! Gaurko egunez franko aditu dut hitz hau. Beti emakumeei zuzendurik, beti emakume langilearen egunaren kariaz. Zorionak? galdetu diot nire buruari. Zorionak zergatik? Emakume langilearen eguna delakoz? Orduan zoritxarreko zorionak!
Aspalditik ospatzen dugu martxoaren 8an Emakume Langilearen Eguna. Zoritxarrez, oraindik orain, berau ospatzen jarraitu behar dugu. Sistema patriarkal hau suntsitzea ez da lan erreza, izan ere, interes gehiegi daude jokoan. Beraz, oraindik orain ospatzeko beharra dagoelarik, zoriontzekoa al da gaurko eguna? Nik bederen ez dut zoriontzeko deus, deitoratzeko eta salatzeko baizik.

Argazkia: Trishhhh (Flickr ), CC

Har beza muxu haundi bat munduan den emakume orok, har beza muxu more bat borroka feministan ari den pertsona orok, har beza muxu gorri bat sistema patriarkal hau onartzeko prest ez dagoen orok. Baina bereziki, har beza muxu iraultzaile bat martxoaren 8a egunero den munduak. Zoritxarreko zorionak!